Showing posts with label தெலுங்கானா. Show all posts
Showing posts with label தெலுங்கானா. Show all posts

ஆக்ஷன்! அடிதடி! காமெடி சென்ட்ரல்! அரசியல் தான்!


இது வரை வந்த திரைப்படங்களிலேயே, மிகச் சிறந்த ஆக்ஷன் பீஸ் என்று சிரஞ்சீவி நடித்து 1995 ஆம் ஆண்டு வெளிவந்த அல்லுட மஜக என்ற தெலுங்குப் படத்தில் இருந்து ஐந்து நிமிடம் ஓடக் கூடிய இந்தக் காட்சியை யூட்யூபில்  இன்றைக்குப் பார்த்தேன்!

ஐந்தே நிமிடங்களில், சிரஞ்சீவி சூப்பர்மேன், ஸ்பைடர் மேன், ஹீ மேன் லாரா கிராப்ட், இந்தியானா ஜோன்ஸ் எல்லோரும் சேர்ந்த கதம்பக் கலவையாக அப்படி ஒரு ஸ்டன்ட் சீன் தான்!  சந்தேகமே இல்லை! தெலுங்கு பேசும் அடுத்த வீட்டு மக்களுக்கு இப்படி எல்லாமே எக்ஸ்ட்ரா பிட்டிங் ஆக இருந்தால் தான் பிடிக்கும் என்பதும் தெரிந்தது தான்!


ஆனால் சிரஞ்சீவி அடித்த ஸ்டன்ட்களிலேயே, சூப்பர் ஸ்டன்ட், சூப்பர் காமெடி எல்லாமே, தனித் தெலங்கானாவை முதலில்  ஆதரித்து  விட்டு அப்புறம் அப்படியே சோமர்சால்ட்  அடித்து, எதிர்ப்பும் தெரிவித்தாரே அது தான் என்று தோன்றுகிறது!

சால்வை அழகர் பானா சீனா, தெலங்கானா கோரிக்கையை  ஏற்பதாக நள்ளிரவில் அறிவித்த வேகமென்ன, எதிர்ப்புக்கள் கிளம்பின வேகத்தில் அப்படியே பதுங்கிக் கொண்ட லாவகமென்ன, உள்துறை அமைச்சகத்தின் வேலை அதிகமாகி விட்டது, அதனால் அதையும் இரண்டாகப் பிரித்தால் என்ன என்று மறுகியது என்ன இப்படி கண்டனூர் பானா சீனா அடித்த ஸ்டன்ட் இருக்கிறதே, அதற்கு முன்னால் சிரஞ்சீவி பிச்சை வாங்க வேண்டும்!

தானைத் தலைவியின் பிறந்த நாள் அறிவிப்பாகதெலங்கானா தனிமாநிலமாக ஆக்குவதான அரசின் முடிவை  வெளியிடலாம் என்ற யோசனையை, கொஞ்சமும் ஆராய்ந்து பார்க்காமல் வெளியிட்டு விட்டு, குத்துதே குடையுதே என்று பானா சீனா கண்ணைக் கசக்கியதும்,  மலையாளத்து மாமேதை எம் கே நாராயணன் காவு கொடுக்கப் பட்டு, மேற்கு வங்காள கவர்னராக ஆக்கப் பட்ட ஸ்டன்ட்  சும்மா லேசுப்பட்டதா என்ன!

இப்போது நீதிபதி ஆர் எஸ் கிருஷ்ணா தலைமையில் தெலங்கானா விஷயமாக விசாரணைக் கமிஷன்! இன்னும் எவ்வளவு சூப்பர் ஸ்டன்ட் எல்லாம் வரப் போகிறதோ!?

இவர்கள் அடித்து நொறுக்குகிற ஸ்டன்ட்களில், மாட்டிக் கொண்டு விழிக்கும் மக்களுக்கு எப்போது விடிவுகாலம்? 

எப்போது விழித்துக் கொள்ளப் போகிறோம்?





 

சண்டேன்னா மூணு! கதை கேளு! கதைகேளு!

சந்தேகம் இல்லே! சந்தேகம் இல்லே! உண்மையான வளர்ச்சி எதில் என்றால்........!


2009 இன் சந்தேகமே இல்லாத வளர்ச்சி எதில் என்று பார்த்தால், சோஷல் நெட்வொர்க் என்று சொல்லப்படும் இணையம் வழி வளரும் தொடர்புகள் தான்! கணினி அறிவு இருப்பவர்கள் தான் பங்குகொள்ள முடியும் என்ற நிலையை மாற்றி, இன்றைக்கு  கணினிக் கைநாட்டான நான் கூடப் பதிவுகள் எழுதிக் குவிக்கிற அளவுக்கு, அதுவும் என் தாய் மொழியிலேயே என்ற அளவுக்கு வளர்ந்திருக்கிறது!

ட்விட்டர்,  ஃபேஸ்புக் என்று தொடர்ச்சியாகப் புதுப் புது வடிவங்களோடு, இத்தகைய சமூகத் தொடர்புகள் வளர்ந்து கொண்டிருப்பதைப் பற்றிய செய்திக் கட்டுரை இங்கே!  

இணையம் ஒரு பரந்தவெளி! இந்தப் பரந்தவெளியில், எந்த அளவுக்குப் பரந்த மனதோடு, மாற்றுக் கருத்து இருந்தாலுமே அதையும் மிக நாகரீகமாக மறுத்துச் சொல்வதிலும், அடுத்தவர் சிந்தனையோட்டத்தைப் புரிந்துகொள்ளவும், இணையம் வழி வளரும் தொடர்புகள், இணையம் வழி வரும் உறவுகளாகவுமே மாறுவதில் நமக்கும்பொறுப்பிருக்கிறது.

பதிவர் உண்மைத்தமிழனுக்கு அவரது வலைப் பதிவுகள் மீண்டும் கிடைத்து விட்டன. ஆனாலும், இந்த மாதிரி அனுபவத்தில் சுட்டுக் கொண்ட பிறகுதான் ஞானியாக வேண்டும் என்பதில்லையே! இந்த மாதிரிக் கணக்குகள் முடக்கப் படுவது, திரும்பப் பெறுவது ஒரு ரகம் என்றால், யாரோ ஒருவர் உங்களுடைய கணக்கை ஹாக் செய்வது,  அந்தரங்க விஷயங்கள், படங்கள், வங்கிக் கணக்குகள் முதலானவற்றைத் திருடுவதுமே அடிக்கடி நிகழ்ந்து கொண்டிருப்பது தான்.

உங்களுடைய கூகிள் பயனர் கணக்கை எப்படிப் பாதுகாத்துக் கொள்வது என்பதை இங்கே பார்க்கலாம்! 


பரந்த மனதோடு, அடுத்தவரைப் புரிந்துகொள்ள முடியாவிட்டால் கூடப் பரவாயில்லை, மனம் நோகும் படி பின்னூட்டங்களோ, விமரிசனங்களோ இல்லாதபடி  பார்த்துக் கொள்ளுங்கள். முடிந்தால், உற்சாகப் படுத்துகிற வார்த்தைகளை எழுதுங்கள்!  இதை எழுதும் போது என் முகத்தை, மின்னெழுத்துக்களால் ஆன மாயக் கண்ணாடியில் பார்த்துக் கொண்டே தான், எனக்காகவுமேஎழுதுகிறேன்! 


பரந்த மின்வெளியில் பாதுகாப்புடன் புத்தாண்டைத் தொடங்குங்கள்!
 oooOooo


 இந்தப் பக்கங்களில் கொஞ்சம் அரசியல், பொருளாதாரம், மேலாண்மை, நிர்வாகம், தலைமைப் பண்பு என்று பல தலைப்புக்களிலும் பேசியிருக்கிறோம்! எல்லாவற்றிலுமே ஒரே ஒரு அடிப்படைக் கேள்வி தான்! ஆதார சுருதியாக இருப்பதைப் படிக்க வருகிறவர்கள் புரிந்து கொண்டிருப்பார்கள் என்ற நம்பிக்கையில் தான்!

எங்கே போய்க் கொண்டிருக்கிறோம்?

எங்கே போய்க் கொண்டிருக்கிறோம் என்பது தெரிந்தால் தான், எதற்காகப் போய்க் கொண்டிருக்கிறோம் என்பது லட்சியமாக, இப்போதிருப்பதை விட அடுத்த வளர்ச்சிக்கு இருப்பதே புரிய வரும்! எங்கே போக வேண்டும் என்பதில் கவனம், எப்படிப் போக வேண்டும் என்பதில் தெளிவு, தொடர்ந்து வரும்!

இல்லையென்றால், போன பதிவில் சொன்ன மாதிரி,

"உங்களுக்கு நீங்கள் எங்கே இருக்கிறீர்கள் என்பது தெரியவில்லை, எங்கே போகவேண்டும் என்பது கூடத் தெரியவில்லை! ஆனால், நான் உங்களுக்காக அதைத் தெரிந்து சொல்ல வேண்டுமென்று  நினைக்கிறீர்கள்! என்னை பார்ப்பதற்கு முன்னால் என்ன நிலையில், தெளிவில்லாமல் இருந்தீர்களோ அதே நிலையில் தான் இப்போதும் இருக்கிறீர்கள். ஆனால், குறை சொல்வதற்கு ஒரு ஆள் கிடைத்தவுடன், என் மேல் குற்றம் சொல்கிறீர்கள் பாருங்கள் அதிலிருந்து தான் !"  என்றாகிவிடக் கூடும்!

என்ன நினைக்கிறீர்கள் என்பதை, நீங்கள் தான் சொல்ல வேண்டும்! சொல்வீர்கள்தானே?

 oooOooo

கதை கேளு! கதை கேளு!

மைகேல் மதன காமராஜன் படத்தில், டைட்டில் பாட்டிலேயே, முன்கதைச் சுருக்கத்தை சொல்லுகிற டெக்னிக் நினைவிருக்கிறதா? குறைந்தபட்சம் அந்த டெக்னிக்? ஐம்பதிலும் ஆசை வரும் என்று கூட ஒரு பாட்டு உண்டு! எண்பதைத் தாண்டிவிட்டால் ஏத்தம் வரும் போல! எண்பதைத் தாண்டி  ஏத்தத்தோடு அலைந்த ஒருத்தர் வேறு வழியில்லாமல், பதவியில் இருந்து ராஜினாமாசெய்திருக்கிறார்!

தெலுங்கானா விஷயத்தில்,ஆந்திரா பற்றி எரிந்து கொண்டிருக்கும்  நேரத்தில், ஆந்திர மாநில ஆளுநர் என் டி திவாரி பாவம் ரொம்பவே  "காய்ந்து" போயிருப்பார் போல! காய்ந்ததைக் கொஞ்சம் குளுமைப் படுத்திக் கொள்ள, என்னமோ செய்யப் போக அது என்னமோ ஆகிவிட்டது! மூன்று முறை உத்தரப் பிரதேச முதலமைச்சராக இருந்தவர்! உத்தராகண்ட் மாநிலம் அமைக்கப்பட்ட போது அதன் முதல் முதல் அமைச்சர்! பாராளுமன்றங்களின் இரு அவைகளிலும் உறுப்பினராக இருந்திருக்கிறார்! மத்திய அமைச்சராகவும் இருந்திருக்கிறார். ராஜீவ் காந்திக்குப் பின்னால், பிரதமர்  பதவிக்குக் கூட காங்கிரஸ் கட்சியின்  வேட்பாளராக முன்னிலையில் இருந்து, எப்படியோ நரசிம்ம ராவிடம் வாய்ப்பைஇழந்தவர்!

காங்கிரஸ் கலாச்சாரப்படி,  அடிமை விசுவாசி என்றால் வீட்டுக்கு அனுப்பவேண்டிய கிழடுகளுக்கும் உற்சாக டானிக், கவர்னர் பதவி தருவது! ரொம்ப வயதாகி விட்டது என்ற காரணத்தைக் காட்டி,  2006 இல் ஒய்வு பெற விரும்பினாராம்! அடுத்த வருடமே காங்கிரஸ் அவரை ஆந்திர மாநிலத்தின் கவர்னராக்கி அழகு பார்த்தது! 

மானோடும் மயிலோடும்  ஓவராக ஆடினார் என்று வீடியோ ஆதாரங்களுடன் ABN செய்திச் சானலில் செய்தியை போட, கவர்னர் தரப்பு வேக வேகமாக மறுத்துப் பார்த்தது, நீதிமன்றத்திலும் வீடியோவை ஒளிபரப்புவதற்குத் தடை உத்தரவும் வாங்கி நிம்மதிப் பெருமூச்சு விடுவதற்கு முன்னாலேயே ஆர்ப்பாட்டங்கள் அது இது என்று கிளம்பவே, மேலிடம் கழற்றி விட முடிவு செய்து விட்டது.. இன்றைக்கு யூட்யூபில் சூப்பர் ஹீரோ யார் என்று பார்த்தால்  என் டி திவாரி தான்! கீழே உள்ள வீடியோவைப் பாருங்கள்!  சுமார் எட்டு நிமிடங்கள் தான்! என்ன நக்கல்!


ஆல் இன் ஆல் அழகு ராஜா!  கதையை அருமையான பாடலோடு சொல்லியிருக்கும் இந்த வீடியோவை வலையேற்றம் செய்திருப்பவரைப் பாராட்டியே ஆகவேண்டும்! ஐயே! வேறு வில்லங்கமான பிட்டுப் படம் இருக்கும் என்று நினைத்து ஏமாந்தால் அதற்கு நான் பொறுப்பில்லை!

ஞாயிற்றுக் கிழமை காலை, இப்படி அமர்க்களமான காமெடியோடு, இந்த வாரம் சண்டேன்னா மூணு!

அப்புறம், காங்கிரஸ் கட்சிக்கு இது 125 ஆவது ஆண்டு! 2009-2010 ஒரு ஆண்டு முழுவதும் விழா எடுத்து, காங்கிரஸ் கட்சியின் அருமை பெருமைகளைச் சொல்ல வேண்டும் என்றெல்லாம் திட்டங்கள் வைத்திருந்தார்கள். பாவம்! நம்மூர் அரசியல் வித்தகர் பானா சீனா கொளுத்தி போட்ட ஒரு அறிவிப்பில் ஆந்திரா கொழுந்து விட்டு எரிகிறது! பானா சீனாவுக்கு இன்னும் கொளுத்திப் போடுகிற ஆசை போகவில்லை போல! உள்துறை அமைச்சகத்தையும் பிரிக்க வேண்டுமாம்! சொல்வார்களே, ஆக்கமாட்டாதவன் இடுப்பிலே அம்பத்தெட்டு கருக்கறுவா! அந்தமாதிரி!


ஆளுநர் களைப்புத் தீர, ராஜ் பவனில் ராஜ லீலையை நடத்திக் கொண்டிருக்கிறார்! இதற்கெல்லாம் உதவியாக இருந்தது, ஆளுநரின் சிறப்பு அதிகாரி! Officer on Special Duty! என்று ABN சானல் சொல்கிறது! ஸ்பெஷல் டூட்டி என்பது  இது தான் போல இருக்கிறது !

இயக்குனர் ராஜசேகர்! இருக்கிறீர்களா? உங்களுக்கு அடுத்த படத்திற்குத் தலைப்பு ரெடி!

இது தாண்டா ஸ்பெஷல் டூட்டி!

காங்கிரசுக்கு மக்கள் சொல்ல வேண்டிய தகவல் ஒன்றே ஒன்று தான்!

விடுதலை அடைந்ததும் மகாத்மா காந்தி காங்கிரஸ் கட்சியின் இலக்கு எட்டி விட்டது, கலைத்து விட வேண்டியது தான் என்று ஆலோசனை சொன்னார்! இப்போது கூட காந்தியின் சொல்படி நடப்பதற்கு ஒரு நல்ல வாய்ப்புக் கிடைத்திருக்கிறது. கலைத்துவிடுங்கள்!
 

என்னத்தைப் படிச்சு...!

இன்றைய செய்திகளை வாசித்து, வாசித்து, ................பரிணாமம் இப்படித் திரும்பிவிடக்கூடாது!


படம் பார்த்துப் படிக்கும் பாடம்! ஆக்குவதற்கு அதிக நேரம்! அழிப்பதற்கு அரசியல்வாதியாக இருந்தாலே போதும்!

தெலங்கானா, காங்கிரஸ் அரசியலின் முதல் கோணல்! 

தெலங்கானா-மொழிவாரி மாகாணங்களாக 1956 இல் பிரிக்கப்பட்ட போது ஏற்பட்ட முதல் கோணல்!


தெலங்கானா என்பது தான் சரியானது என்றாலும் நடைமுறையில் தெலுங்கானா என்றே அழைக்கப் படுகிற இந்தப் பகுதியை பற்றிய  சில விஷயங்களை முந்தைய பதிவில் கொஞ்சம் தொட்டுப் பேசியிருந்தோம். தெலுங்கு, இங்கே சுத்தத் தெலுங்காக இல்லாமல், கொஞ்சம் உருது மொழியும் கலந்து இருக்கும். ஹைதராபாத் உட்பட பத்து மாவட்டங்களைக் கொண்ட இந்தப் பகுதி தற்போதைய ஆந்திர மாநிலத்தின்  42 சதவீத  நிலப்பரப்பைக் கொண்டது. மூன்றரைக் கோடி மக்கள், 119 சட்ட மன்றத்  தொகுதிகள் ,   17 பாராளுமன்ற தொகுதிகள் இருந்தும் கூட இன்னமும் பின்தங்கிய பகுதியாகவே இருக்கிறது. தெலுங்கும் உருதுவும் பேசும் மொழிகளாக இருக்கின்றன. கனிம வளங்கள் முதற்கொண்டு கிருஷ்ணா, கோதாவரி நதிகள் இதன் வழியாகப் பாய்ந்தாலும், தண்ணீருக்காகவும் மின்சாரம் உள்ளிட்ட எல்லா விஷயங்களுக்குமே ஆந்திராவை மட்டுமே நம்பியிருக்க வேண்டிய பரிதாபம். 1947 இல் சுதந்திரம் அடைந்து, ஹைதராபாத் சமஸ்தானம் இந்தியாவுடன் இணைக்கப் பட்டபோது கூட தெலங்கானா தனி பிரதேசமாகத் தான் இருந்தது. நிஜாம்  ஆட்சியில் நடந்த ஒரே உருப்படியான விஷயம், தெலங்கானா பகுதிக்குட்பட்ட ஹைதராபாத் நகரத்தை நன்கு அபிவிருத்தி செய்தது மட்டுமே! இன்றைக்கு ஹைடெக் நகரமாக வளர்ந்திருந்த போதிலும், தெலங்கானா மக்களுக்கு எந்தப் பிரயோஜனமும்இல்லை. .

1956 இல் மொழிவாரி மாகாணங்கள் என்று பிரிக்கப்பட்டபோது, அதுவரை தனியாகவே இருந்து தொடர்ந்தும்  தனியாகவே இருக்க விரும்பிய தெலங்கானா மக்களுக்கு ஏராளமான, சலுகைகள், வாக்குறுதிகளைக் கொடுத்து, ஆந்திரா, ராயலசீமா பகுதிகளோடு இணைத்துப் புதிய ஆந்திர மாநிலம் உருவானது.

வாக்குறுதிகள்? சலுகைகள்? தேர்தல் வாக்குறுதிகளைப் போலவே, கொடுக்கப்பட்ட உறுதி மொழிகள் அத்தனையும் காற்றில் பறக்க விடப்பட்டன.

தெலங்கானா பகுதிகளில் மட்டுமல்ல, எல்லைப்புற மாகாணங்களிலும், பழங்குடி மக்களிடம், அவர்களிடமிருந்த நிலத்தைப் பெற்றுக் கொண்டு அவர்களுடைய வாழ்வுக்கும் வளர்ச்சிக்கும் எதுவுமே செய்யாத காங்கிரஸ் அரசின் மெத்தனம், வெவ்வேறு கோளாறுகளாக , இன்றைக்குத் தீர்க்கப்படாத பிரச்சினைகளாக வளர்ந்து நிற்கிறது.

முற்றும் கோணலாக்காமல் விட மாட்டார்கள் போல இருக்கிறது.

மாநிலங்கள் சிறிதாக இருப்பதால் என்ன நன்மை, சமீபத்தில் பிரிக்கப்பட்ட மாநிலங்களில் மாவோயிஸ்டுகளைத் தவிர  வேறு எந்த வளர்ச்சியுமே இல்லை என்கிற மாதிரி கிழக்கு பத்ரி ஒரு பதிவு எழுதியிருப்பதை  இன்று தான் படித்தேன். உண்மையான பிரச்சினை,  மாநிலங்களை, மாவட்டங்களைப் பிரிப்பதிலோ, பெரிது-சிறிது, நிர்வாக வசதி என்பதில் எல்லாம் இல்லை.  தீர்க்கப்படாத பிரச்சினைகள் முற்றி, இப்போது மென்னியை முறித்துக் கொண்டிருக்கின்றன.

தொடர்ந்து புறக்கணிக்கப் பட்டு வரும் மக்களுடைய பிரச்சினைகள்! அதைப் பற்றிப் பேசுவதற்கு யாரையும் காணோம்!

"எனவே தெலுங்கானா மக்கள் தனி மாநிலம் கேட்டுப் போராடுவது நல்லதல்ல என்று தோன்றுகிறது. மாறாக, அவர்கள் பகுதியைச் சேர்ந்த ஒருவரை முதல்வர் ஆக்கச்சொல்லி சோனியா காந்தியின் கால்களில் விழலாம்"  என்று பத்ரி எழுதியிருக்கிறார்!

அபத்தமாக இருப்பதில் அரசியல்வாதிகளுக்குப் போட்டியாகப் பதிவர்கள் உருவாகி வருவதை நினைத்துத் தலையில் அடித்துக் கொள்வதைத் தவிர வேறு என்ன செய்ய முடியும்?
 


அட! காந்தி கடைப்பிடித்த உண்ணாவிரதப் போராட்டத்தின் சக்தி காங்கிரஸ் எம் பிக்களுக்குக் கூடத் தெரிந்து விட்டதே! இங்கே பாருங்கள் ஒரு காங்கிரஸ் எம் பி தேசத்தை ஒன்றுபடுத்துங்கள்! பிளக்காதீர்கள் என்று உண்ணாவிரதம் இருக்கப் போனாராம்!

நல்லவேளை!உண்ணாவிரதம் இருந்து தமது  எதிர்ப்பைத் தெரிவிக்க முயல்பவர்களை நக்கலடித்து உண்ணும் விரதம் இருந்து வெறுப்பேற்றுகிற, கொச்சைப்படுத்துகிற  நம்மூர்க் கழகங்களின் பண்பாடு, மனவாடுகளிடம் இன்னமும் பரவவில்லை என்று நினைத்து சந்தோஷப்பட்டுக் கொள்ள வேண்டியதுதான்!

காங்கிரஸ்! கட்சியும் ஆட்சியும்! இன்னும் எத்தனை நாட்கள் தாங்கும்?


சண்டேன்னா மூணு! கொஞ்சம் ஆவக்காய்! ஆந்திரா! அரசியல்!



சண்டேன்னா மூணு! வரவு எட்டணா! செலவு பத்தணா!




எந்த ஒரு பிரச்சினையாக இருந்தாலுமே,  அதற்கான தீர்வுகள் பொதுவாக  இந்த நான்கு அடிப்படைகளுக்குள் அடங்கி விடும் என்று சொல்வார்கள்.


1.       உடனடியாகச் செயலில் இறங்குவது!


2.   ஆறப்போட்டு, நிதானமாகச் செயல் படுவது


3.   அலட்சியம் செய்து, ஒதுக்க வேண்டியது.


4.   அனுவவித்தே  தீர்க்க வேண்டியது!.

பிரச்சினையைத் தீர்க்க நாம் செய்யும் தவறான முடிவுகளே பிரச்சினையைக் கொழுந்து விட்டு எரியச் செய்து விடும். பிரச்சினை எதுவானாலும், அதன் உண்மையான தன்மையை அறிந்து, சரியான முடிவுகளை, சரியான நேரத்தில், சரியாகச் செய்வதில் தான் இருக்கிறது. இதில் செய்யும் குளறுபடிகள், பிரச்சினையைத் தீர்ப்பதற்குப் பதிலாக, இன்னமும் வளர்த்து விடும்!



உதாரணமாக, நம்மூர் பானா சீனா, தெலுங்கானா கோரிக்கையை ஏற்றுக் கொள்வதாக  அறிவித்தார், ஆந்திரா தீப்பற்றி எரிகிறது! தெலுங்கானா கோரிக்கை நியாயம், அல்லது நியாயமில்லை என்பதற்காக இல்லை! சந்தடி சாக்கில் ராஜசேகர ரெட்டி மகன் ஆதரவாளர்கள், தங்களுக்கு "வாழ்வளித்து" வரும் வாரிசை முதல்வராக்க இந்தப் பிரச்சினையை பயன்படுத்திக் கொண்டதும்,  செல்வம் கொழிக்கும் (?) ஹைதராபாத் நகரமே தெலுங்கானாவுக்குள் அடங்கி விடுவதால், அதை விட்டுக் கொடுத்து விடக் கூடாது என்பதில் வேறுபலரும் சேர்ந்து கொண்டதும், நீ ஒன்று சொன்னாயா, நான் நாலு சொல்கிறேன் என்று தெலுங்கானா கொடுத்தால், ராயலசீமா கொடு, கம்மம் கொடு என்று விதண்டாவாதம் செய்வதற்கே பிறந்த சிலரும் கும்மிஎடுத்துக் கொண்டிருக்கிறார்கள்!   என்னதான் பிரதமர் மன்மோகன் சிங் சமாதானம் செய்ய முயற்சி செய்துகொண்டிருந்தாலும், துண்டு போர்த்திய அரசியல் வித்தகர், நேற்றைய பொருளாதாரமேதை  பானா சீனா கிளப்பி விட்டிருக்கும் பிரச்சினை, இப்போதைக்கு ஓயாது போல இருக்கிறது.
 

மஞ்சள் துண்டு தலைவர் ,நேற்றைய நாட்களில் பானா சீனாவை   "சிவகங்கைச் சின்னப் பையன்!" என்று அனுபவமோ முதிர்ச்சியோ இல்லாதவர் என்பதை நக்கலாகச்  சொன்னது சரியாகத் தான் இருக்கிறது!சால்வை அல்லது துண்டு எல்லாம் போர்த்திக் கொண்டதால் மட்டுமே  மஞ்சள் துண்டு போர்த்திக் கொண்டிருப்பவர்  போல சாமர்த்தியம் வந்து விடுமா என்ன?


இந்தமாதிரி அரசியல் வியாதிகள் எல்லாம், தலைவிதியே என்று அனுபவித்தே தீர வேண்டிய அவசியம் உள்ளவை அல்ல! மாற்றப்படவேண்டியவையே! குப்பையில் தள்ள
வேண்டியவைதான்! தாமதிக்கிற ஒவ்வொரு கணமும் நாட்டைக் குப்பையில் தள்ள இவர்கள் தயங்கமாட்டார்கள்!

மாற்றத்தைச் சாதிக்கும் வலிமை, இங்கே வெறும் ஓட்டுக்களை மட்டுமே சொல்லவில்லை, நம்முடைய கைகளில் தான் இருக்கிறது!

  oooOooo


இந்தப்பக்கங்களில் தலைமைப்பண்பு, ஒரு தெளிவான  திட்டத்தோடும், பார்வையோடும் செயல்படுகிற அரசியல் தலைவன், அப்படிப் பட்ட தலைவனிடம் இருக்க வேண்டிய, அல்லது இருக்கக் கூடாத  குணங்கள் என்று கொஞ்சம் மேலோட்டமாகப் பார்த்திருக்கிறோம். காங்கிரஸ் கட்சியை பற்றிய நேற்றைய நாட்களின் இந்தக் கருத்து, அது ஓரளவுக்கு உண்மையானதாகவும் இருந்தது.

"எவ்வளவுதான், காங்கிரஸ் பலவீனப்பட்டுச் சிதைந்துகொண்டிருந்தாலுமே, நாடு முழுமைக்கும் அறியப்பட்ட கட்சியாகவும், எல்லாப் பகுதிகளிலுமே, ஆதரவு சதவீத அளவில் மட்டுமே மாறுபட்டிருந்தாலும், நாடுமுழுக்கவும் தன்னுடைய இருப்பை வெளிப்படுத்திக் கொண்டிருக்கிற ஒரே கட்சி."


இப்போது கூடஇந்தக் கருத்து உண்மையானதாக இருக்கிறது என்றாலும், காங்கிரஸ், தனக்கென்று சொந்த லட்சியங்களோ,தேசத்தின் எதிர்காலத்தைக் குறித்த தெளிவான பார்வையோ, உறுதியான தலைமையோ இல்லாமல், சீரழிவின் உச்சகட்டத்திற்கே போய்க் கொண்டிருக்கிறது. பதவி வெறியும் ஊழலும் நிறைந்த மாநிலக் கட்சிகளுக்குக் கொஞ்சம் தீனிபோட்டுக் கொண்டு,  பதவிவெறியும் ஊழலும் நிறைந்த நபர்களால் மட்டுமே ஆனதாக காங்கிரஸ் மாறி எவ்வளவோ நாட்கள் ஆகிவிட்டன. 

1977 இல் உருவானதுபோல, ஒரு மாற்று முயற்சியை, வழி நடத்துவதற்கும் தலைமை தாங்குவதற்கும் ஜெயப்ரகாஷ் நாராயணன் மாதிரித் தலைவர்கள் இல்லாத வெறுமை நன்றாகவே தெரிகிறது. புரையோடிப்போன  புண்ணை ரண சிகிச்சை மட்டுமே காப்பாற்ற முடியும்! காங்கிரஸ் புரையோடிப்போய்  இனி மீளவே மீளாது என்ற அளவுக்கு அழுகிப்போனதாக இருக்கிறது என்பதையே ஆந்திராவில் நடந்து கொண்டிருக்கும் கூத்துக்கள் காண்பித்துக் கொண்டிருக்கின்றன.


"Rosaiah said he had discussed with the high command the issue of Telangana, and had told it that to pass a resolution in the Assembly was difficult.

On Home Secretary G.K. Pillai’s comment that Hyderabad would be the capital of Telangana, Mr. Rosaiah said he thought the Home Secretary had no proper brief."

ஹிந்து நாளிதழில் செய்தி என்றால், இங்கே இப்படி!

The crisis prompted Rosaiah to publicly express “astonishment, surprise and anguish” at the “flutter” over Home Minister P. Chidambaram’s “so-called statement” on Wednesday night announcing the initiation of the process to create Telangana.


அரசியல்! பாழாய்ப்போன ஓட்டுப்பொறுக்கும் அரசியல்! ஜனங்களுடைய வாழ்க்கையைப் பற்றி கவலைப் படுவதற்காகவா அரசியலுக்கு இவர்கள் எல்லாம் வந்திருக்கிறார்கள்!

oooOooo

தோழர் பி.சுந்தரய்யா

படிக்கக் கிடைத்தும், படிக்கத் தவறியவை!

திரு.வி.திவாகர்! மின்தமிழ் வலைக் குழுமத்தில் அறிமுகமானவர்! தமிழ்மரபு அறக் கட்டளையால் சென்ற ஆகஸ்ட் மாதம் மரபுச் செல்வர் என்று கௌரவிக்கப்பட்டவர்! எழுத்தாளர்! இதுவரை நான்கு சரித்திரப் புதினங்கள் எழுதியிருக்கிறார், அடுத்தவீடு என்ற பெயரில் தன்னுடைய வலைப்பதிவில்  "ஆவக்காயையும் ஆந்திராவையும் யாராலும் பிரிக்கமுடியாது. மலரும் மணமும் போல என்று கூட சொல்லலாம். ஆவக்காய் ஊறுகாயும் கோங்குரா பச்சடியும் சுவையும், காரமும் கூடியதுதான். சுவையில் மயங்கி முதலில் அதை உண்ணும் தமிழர்கள் அதன் காரத்தில் பிறகு கண்ணீர் விடுவதை......."என்று ஆரம்பித்து ஆ..உஷ்...காரம்..ரொம்ப ஜாஸ்தி என்ற தலைப்பில் எதிரும்புதிருமான தன்மை கொண்ட ஆந்திர தேசத்து இயல்பைச் சொல்லியிருந்தார். இந்தப் பதிவைப் படித்துக் கொண்டிருந்த நேரம், உள்துறை அமைச்சர் ப.சிதம்பரம், தெலுங்கானா கோரிக்கை ஏற்றுக் கொள்ளப் படுவதாக, அறிவித்து, அடுத்து அடுத்து அரசியல் ஸ்டன்ட்கள் அரங்கேற ஆரம்பித்து, இன்னமும் முடியவில்லை.

இருபத்தேழு, இருபத்தெட்டு வருடங்களுக்கு முன்னால் தோழர் பி.சுந்தரய்யா எழுதிய புத்தகம், 'தெலுங்கானா போராட்டமும் அதன் படிப்பினைகளும்' நண்பர் ஒருவரிடமிருந்து மிகவும் கெஞ்சிக் கூத்தாடிய பின்னர் கிடைத்தது. முழுதும் படித்து, விஷயங்களை உள்வாங்கிக் கொள்வதற்கு முன்னாலேயே,  இரவல் கொடுத்த நண்பர் திரும்ப வாங்கிக் கொண்டு போய்விட்டார்! படிக்க விரும்பிக் கையிக் கிடைத்தும் படிக்க முடியாமல் போன புத்தகம் அது. இப்போது கிடைத்தால் கூட, அன்றைக்கு என்ன ஆர்வத்தோடு படிக்க நினைத்தேனோ, அதே ஆர்வத்தோடு படிக்க முடியும்!

இன்றைக்குத் தெலுங்கானா கோரிக்கையைப் பற்றிப் படிப்பவர்களுக்குப் பத்தோடு பதினொன்றாக, பிராந்திய உணர்வுகள் மிஞ்சி போனதால் வந்ததாக மட்டுமே தோன்றும்.

இப்போதைய ஆந்திரம் என்பது, மூன்று தனித்தனிப் பகுதிகளாக, ஆந்திரா, ராயலசீமா, தெலுங்கானா என்று இருப்பதைப் படத்திலேயே பார்க்க முடியும்.தெலுங்கானா மக்கள் மிகக் கடுமையான உழைப்பாளிகள், மிக மோசமாக ஏமாற்றப்பட்டவர்களுமே கூட! நிஜாம்  ஆட்சிக் காலத்தில், மிகக் கடுமையான முறையில் சுரண்டப்பட்ட தெலுங்கானா மக்களை, ஒரு ஆயுதம் தாங்கிய போராட்டத்திற்கு, அன்றைய கம்யூனிஸ்ட் கட்சி ஒருங்கிணைத்தது. போராட்டம் தோற்கடிக்கப்பட்டது, ஆயிரக்கணக்கான லட்சிய தாகமும், சுதந்திர வேட்கையும் கொண்ட கம்யூனிஸ்ட் கட்சித் தொண்டர்களும், மக்களும் கொல்லப்பட்டார்கள். சுதந்திரப் போராட்டத்தில் தோளோடு தோள் கொடுத்து நின்ற காங்கிரசும், கம்யூனிஸ்ட் கட்சியும் எதிரிகளாகிப் போன தருணம் ஆரம்பித்தது. 1946-1951 காலகட்டம்.

தெலுங்கானா போராட்டத்தின் பின்னணியையும், அது தோற்றதில் கிடைத்த பாடங்களையும் பரிசீலனை செய்வதற்குக் கட்சி இரண்டாக உடைந்த பிறகு தான் அவகாசமே கிடைத்தது. 1972 ஆம் ஆண்டு, தெலுங்கானா போராட்டத்தில்  பங்குகொண்டு முன்னணியில் இருந்த தோழர் பி. சுந்தரய்யா, ஒரு நீண்ட ஆய்வைக் கட்சிக்கு சமர்ப்பித்ததில் இருந்து, வெட்டியும் சுருக்கியும், கட்சி ஆவணமாக, புத்தகமாகவும் வந்தது. தன்னுடைய சொந்தக் கசப்புக்களையும், கருத்துவேறுபாடுகளையும் சகித்துக் கொண்டு, கட்சி எடுத்த முடிவுக்குக் கட்டுப்பட்டவராக வாழ்ந்து மறைந்த தோழர்சுந்தரய்யா இன்றும் மக்கள் நினைவில் வாழுகிறார்.

வெள்ளைத் துரை போன பின்னாடி வந்த லோகல் துரைமாரும், தெலுங்கானா மக்களைத் தொடர்ந்து ஏமாற்றி வருவது  தான், இன்னும் கொடுமை!

தெலுங்கானா என்றவுடனேயே தோழர் சுந்தரய்யாவும் நினைவுக்கு வருகிறார்! தெலுங்கானா மக்களின் போராட்டமும் நினைவுக்கு வருகிறது!

எதிரும் புதிருமான குணாதிசயங்களை, ஊறுகாய், லட்டு இனிப்பு என்று சொல்லிவிட்டு, ஆந்திராவின் குணாதிசயத்தைச் சொன்ன பொது, வேறு சில விஷயங்களையும் நினைக்காமல் இருக்க முடியவில்லை. போதாக்குறைக்கு இப்போது தெலுங்கானா பிரச்சினை வேறு பற்றிக் கொண்டு எரிகிறதா, சூடும் தாங்கவில்லை.

கடுமையான உழைப்பாளிகள், எளிமையானவர்கள், மிக நேர்மையானவர்கள் என்று ஒரு பெரும்பகுதி! எண்டமூரி வீரேந்திரநாத் தன்னுடைய  கதைகளில் அடிக்கடி உபயோகப்படுத்தும் ஒரு வார்த்தை, மரண ஹோமம்! ஆந்திராவில் இந்த வார்த்தை வெறும் கற்பனையல்ல, அடிக்கடி நடக்கும் நிஜம்!

எளிய மக்கள் தலையில் ஏறிக் காசு மிதிக்கும் கொடூரம், நிஜாம்களுக்கு முன்னாலேயே இருந்ததா, நிஜாம் ஆட்சியில் தான் பெரிதாக வளர்ந்ததா என்பதை அவ்வளவு சுலபமாக எல்லோரும் தெரிந்துகொள்ள முடியாதபடிக் குழப்பிக் கொண்டிருக்கும் ஆந்திர அரசியல் ஆவக்காயைச் சாப்பிடாமலேயே கண்களில் நீரை வரவழைத்துக் கொண்டிருக்கிறது.