டொயோடா கார் தயாரிப்பு நிறுவனத்தின் உற்பத்தி முறை, உலகப் பிரசித்தமாக இருந்தது ஒரு காலம். கண்ணை மூடிக் கொண்டு ஜப்பானிய மேலாண்மை முறைகளை ஆதரித்தவர்கள் எல்லாம், இன்று கண்ணை மூடிக் கொண்டு கல்லெறிகிற காலமுமாகிப் போனது.
வாடிக்கையாளருடைய முழுத் திருப்தியையே முதன்மையான லட்சியமாகக் கொண்ட தயாரிப்பு முறையில், தர உத்தரவாதமும், நம்பகத் தன்மையும், உற்பத்தி நிலையின் ஒவ்வொரு கட்டத்திலும் முக்கியமாக வலியுறுத்தப்பட்டது. ஊழியர்களுடைய யோசனைகளை, கருத்துக்களை, ஒவ்வொரு நிலையிலும் கேட்டுப் பரிசீலித்து, அதை நடைமுறைக்குக் கொண்டு வந்ததிலும், உற்பத்திக்கான மூலப் பொருட்களை வீணாக்காமல், தேவைக்கு அதிகமாக ஸ்டாக் வைத்துக் கொள்ளாமல், தேவைப் படுகிற நேரத்தில் மட்டுமே வைத்துக் கொள்கிற முறையிலும், உற்பத்தியின் ஏதோ ஒரு நிலையில், குறைபாடு கண்டுபிடிக்கப் பட்டால், உற்பத்தி வரிசையை அப்படியே நிறுத்தி விட்டு, கோளாறைச் சரி செய்வதற்கு முக்கியத்துவமும் கொடுத்து, தயாரிப்பு கலையை, ஒரு சிகரத்துக்கு எடுத்துச் சென்ற மேலாண்மை முறையாக டொயோடா தயாரிப்பு முறை கொண்டாடப் பட்டது.
உற்பத்தி என்பது எண்ணிக்கையின் அடிப்படையில் மட்டுமே தீர்மானிக்கப் படுகிற அமெரிக்க அசெம்ப்ளி லைன் நிர்வாக முறைக்கு, நேர் மாறாக ஜப்பானிய தயாரிப்பு முறை தர நிர்ணயம், வாடிக்கையாளரை முதன்மையாகக் கொண்ட உற்பத்தி முறைக்கும் அடிப்படையில் இருந்தே நிறைய வேறுபாடுகள் இருந்தன.
மேலே உள்ள இரண்டு படங்களும், அமெரிக்கக் கார் தயாரிப்பு நகரமான டெட்ராய்ட்டில் இருந்து வரும் freep.com தளத்தில் வெளியாகி இருக்கும் நக்கல் படங்கள்! தன்னுடையதே மொத்தமாகக் காற்றில் பறந்து கொண்டிருக்கும்போது, அடுத்தவன் துண்டு பறப்பதைக் குத்திக் காட்டிச் சிரிக்கும் நக்கலுக்கும் இதற்கும் அதிகவித்தியாசமில்லை !
(அமெரிக்காவின் முன்னுரிமைகள் எவைகளில் இருந்தது என்பதை இந்த ஒரு துணுக்குச் செய்தியே சொல்லும்!)
உலகிலேயே நம்பர் ஒன் கார் தயாரிப்பு நிறுவனமாக இருந்த ஜெனரல் மோட்டார்ஸ் 2008 இல் அந்த முதன்மை அந்தஸ்தை இழந்தது. அதற்கு நெடுங்காலத்துக்கு முன்னாலேயே, ஜப்பானியத் தரத்தோடு போட்டி போட முடியாமல் அமெரிக்கக் கார் தயாரிப்பு நிறுவனங்கள், தொடர்ந்து பலவீனப் பட்டுக் கொண்டே வந்தன. அமெரிக்கக் கனவுகள் எப்போதுமே யதார்த்தத்தை விட்டு விலகி ரொம்ப உயரத்தில் தான் இருக்கும்.அதே நேரம் நடைமுறையில் கழுகு எப்போதுமே கீழே செத்துக் கிடக்கும் எலி முதற்கொண்டு லாபம் ஒன்ற ஒரு இரையை மட்டுமே தேடுவதாகக் கீழே அதலபாதாளத்தில் கொண்டுவந்து தான் சேர்க்கும் என்பதில், அமெரிக்கக் கார் தயாரிப்பு நிறுவனங்கள், அமெரிக்க வங்கித்துறை, நிதித்துறை இவைகளுக்கு எந்த விதத்திலும் குறைந்ததில்லை.
முந்தைய பதிவுகளில், டொயோடா நிறுவனம் தற்சமயம் சந்தித்து வரும் பிரச்சினைகளைப் பேசியிருக்கிறோம். டொயோடா சந்தித்து வரும் பிரச்சினைகள் அமெரிக்கர்களுக்கு இப்போது கேலிக்குரியதாகப் போய் விட்டது! தங்களுடைய நிறுவன முறைகளில் காணப் படும் பேராசையே, தங்களுடைய பொருளாதாரச் சரிவுக்குப் பெருங்காரணமாக இருக்கிறது என்பதை அமெரிக்கர்களுடைய நாந்தேன் மதுரை ஹீரோ மனோபாவம் ஒப்புக் கொள்ள மறுக்கிறது.
பிரச்சினை என்று வந்தவுடன், அதுவரை போற்றிக் கொண்டாடிக் கொண்டிருந்த ஒரு கோட்பாட்டை அப்படியே மறுதலிக்கிற மனோபாவம், பிரச்சினைக்கு உண்மையான தீர்வை எப்போதுமே சொல்லப் போவது இல்லை. ஆனால், டொயோடாவின் தற்போதைய பிரச்சினைகள், இந்திய நிறுவனங்களுக்கும், மேலாண்மை, நிர்வாகவியல், சந்தை உத்திகள், தர நிர்ணயம், சந்தைப் பொருளாதாரம் போன்ற துறையில் இருப்பவர்களுக்கு, மிக அருமையான பாடத்தைச் சொல்லிக் கொடுப்பவையாக இருப்பதனால், கூர்ந்து கவனிக்கப் பட வேண்டிய ஒன்றாகவே தொடர்ந்து இந்தப் பக்கங்களில், சொல்லிக் கொண்டிருக்கிறேன். கொஞ்சம் ஆர்வமுள்ளவர்களுக்காக ஒரு செய்தி இங்கே.
டொயோடா தயாரிப்பு முறையின் முக்கியமான அம்சங்களை முந்தைய பதிவுகளில் படங்களாகப் பார்த்திருக்கிறோம். நினைவு படுத்திக் கொள்வதற்காக மீண்டும் கீழே!
ஒரு தயாரிப்பு, அதற்குத் தேவைப்படும் பொருட்களைத் தேவையான நேரத்தில் மட்டும் எடுத்துக் கொள்கிற இன்வெண்டரி மேனேஜ்மேண்டில் இருந்து ஆரம்பித்து, ஊழியர்களுடைய மனப்பூர்வமான ஒத்துழைப்பையும், உழைப்பையும் பெறுவது என்பது உற்பத்தியின் மிக முக்கியமான பங்காக இருக்கிறது; தயாரிப்பு முறைகள் சோதித்து உத்தரவாதப் படுத்தப்பட்டவைகளாக, தவறு, குறைகள் கண்டுபிடிக்கப் படுவதிலும் ஒரு தீர்மானமான அளவீடுகளைக் கொண்ட முறைகளாக, தவறுகள் கண்டுபிடிக்கப் படுகிற நிலையில், உற்பத்தி நிறுத்தப் பட்டு அங்கே தவற்றை சரி செய்வதில் முழுக் கவனம், தவறு மறுபடி நிகழாது என்ற உறுதியான நிலையில் மட்டுமே தயாரிப்பைத் தொடர்வது, வாடிக்கையாளருக்கு, தயாரிப்பின் மீதான நம்பிக்கைக்கு முழு உத்தரவாதம் இவைகளெல்லாம் தான் டொயோடா தயாரிப்பு முறையின் அடிப்படைத் தூண்கள்!
மூலப் பொருட்கள், உழைப்பை வீணாக்குவது, காலதாமதத்தால் வரும் அனர்த்தங்கள் எல்லாம் இந்த முறையில் அனேகமாக முழுமையாகத் தவிர்க்கப் படுவதே இதன் மிகச் சிறந்த அம்சம்! போட்டியாளரை விட விலை குறைவாக, நுகர்வோருக்கு வாங்கும் மதிப்பை அதிகம் தருவதாக, தரத்தில் சிறந்ததாக ஜப்பானியத் தயாரிப்புக்கள் சர்வதேசச் சந்தையில் கடந்த ஐம்பதாண்டுகளில் முதலிடம் பிடித்ததில், டொயோடா தயாரிப்பு முறை ஒரு தர அளவீடாகவே இருந்தது. இப்பொழுதும் இருக்கிறது!
கைஜென் என்று சொல்லப் படும் தொடர்ந்து நிகழும் முன்னேற்றம் என்பதே அதன் ஜீவனாக இருக்கிறது. அமெரிக்க முறைகளைப் போல, விளம்பரங்கள், தம்பட்டங்கள், விரையங்கள், கொழுத்த லாபம் என்ற அம்சங்களை மட்டுமே பிரதானமாகக் கொண்டது அல்ல. அமெரிக்க கார்தயாரிப்பு நிறுவனமான போர்ட் கம்பனி கூட, டொயோடா தயாரிப்பு முறையில் உள்ள நல்ல அம்சங்களைத் தன்னுடைய தொழிற்சாலைகளில் நடைமுறைப்படுத்த முன்வந்ததே,டொயோடா முறையில் உள்ள நிறைவைக் காட்டும்.
அப்புறம் பிரச்சினை எதனால் வந்தது? தான் உருவாக்கிய நடைமுறைகளைத் தானே பின்பற்ற டொயோடா நிறுவனம் தவறி விட்டது என்பது தான்!
ஐரோப்பாவில் ஒன்றரை வருடங்களுக்கு முன்னாலேயே கண்டறியப் பட்ட இந்தக் குறைபாடுகளைக் களைய, நிர்வாக மட்டத்தில் தவறியதே பிரச்சினை முற்றுவதற்குக் காரணமாக இருந்திருக்கிறது. தொடர்ந்த விரிவாக்கம், உற்பத்தியைக் கூட்டித் தரவேண்டிய சந்தை நிர்பந்தம் இவற்றில் கவனம் செலுத்தியபோது, தவிர்க்கமுடியாத பக்கவிளைவுகளாகத் தரக் குறைவும்சேர்ந்துவிட்டதாக, தற்சமயம், இந்தத் துறையில் உள்ளவர்களால் கண்டு சொல்ல முடிகிற காரணங்கள். டொயோடா தயாரிப்பு முறையை விட மேலான உற்பத்தி முறை வேறெதுவும் இல்லை. பிரச்சினைக்குத் தீர்வு, அதை பின்பற்றுவதில் தான் இருக்கிறது என்கிறார்கள் வல்லுனர்கள்.
இங்கே டொயோடா பிரச்சினையைப் பேசும்போது, இந்தியாவில் கார்தயாரிப்பு நிறுவனங்களின் யோக்கியதை என்னவாக, எப்படிப்பட்டதாக இருந்தது என்பதையும் கொஞ்சம் வரலாற்றுக் குறிப்புக்களோடு தொடர்ந்து பேசுவோம்!
