மண்டேன்னா ஒண்ணு! #அரசியல்

அதிமுகவில் EPS - OPS இருவருக்கும் இடையில் நடந்து வரும் இழுபறி, சட்டசபை எதிர்க்கட்சித் தலைவராக  யாரைத் தேர்ந்தெடுப்பது என்பதிலும் நீடித்ததில் எடப்பாடி பழனிச்சாமி அதிமுகவின் சட்டமன்றத் குழுத் தலைவராகத் தேர்ந்தெடுக்கப்பட்டிருக்கிறார்.

நாளை 11 ஆம் தேதி சமஉக்கள் பதவியேற்கவிருக்கும் நிலையில் அதிமுகவில் இப்படி ஒரு இழுபறி தேவையே இல்லாதது. OPS கட்சிக்குள் தனது செல்வாக்கு என்ன என்பதை  உணராமலேயே இதுவரை இருந்திருக்கிறார் என்பது விசித்திரம் ஆனால் உண்மை. தமிழக சட்டசபை வரலாற்றில் ஒரு முதல்வரும் இரண்டு முன்னாள் முதல்வர்களும் இருப்பது இது இரண்டாவது முறை. 2006 இல் கருணாநிதி முதல்வர், எதிர்வரிசையில் ஜெயலலிதா, OPS என இரு முன்னாள் முதல்வர்கள்! 2021 இல் இசுடாலின் முதல்வர்,  EPS - OPS என இரு முன்னாள் முதல்வர்கள் என்பது வெறும் தகவல் தான்! உபயோகம், சுவாரசியம் இருக்குமா என்பது உங்கள் சாய்ஸ்!   

இன்றைய இந்து தமிழ்திசை நாளேட்டில் என்.மகேஷ் குமார் எழுதியிருக்கும் ஒரு செய்திக்கட்டுரை கொஞ்சம் வேடிக்கை,தகவல் பிழையுடன் இருக்கிறது. கருணாநிதி பூர்வீகம் ஆந்திரா என்பது எம்ஜியார் முதல்வராக இருந்த நாட்களில் பல்கலைக்கழக ஆராய்ச்சியாகவே நடந்தது என்பது வேடிக்கை. ஆந்திரா, தமிழகம் எல்லாம் ஒன்றாக இருந்த சமயத்தில் என ஆரம்பித்திருப்பது தகவல் பிழை. தமிழகத்தின் வட எல்லையாகத் திருவேங்கடம் என்றுதான் இருந்திருக்கிறதே தவிர ஆந்திராவும் தமிழகமும் ஒன்றாக இருந்ததே இல்லை.

உரையரங்கத்தை யார் நடத்துகிறார்கள் என்பதைக் கொஞ்சம் கவனித்துப்பாருங்கள்! திருக்கோவில் நடைமுறைகளுக்குத் தெளிவும் தீர்வும் சொல்ல இவர்கள் யார்? 

  

http://srirangam.org/ கோவிலின் அதிகாரப்பூர்வமான இணைய தளத்திலிருந்து எடுக்கப்பட்ட pdf வடிவ அறிவிப்பு மேலே. ஜீயர்களை நியமிக்க இவர்கள் யார்?

இப்பொழுதும் கூட மாநிலத்தில் புதிய அரசு அமைந்து நான்கே நாட்கள் தான் ஆகிறது என்பதால் விமரிசனம் செய்வதைத் தவிர்க்கிறேன். மூன்றுமாதம் அல்லது 100 நாட்கள் என விமரிசிப்பதைத் தவிர்ப்பது கூட நானாக ஏற்படுத்திக்கொண்ட, சுய கட்டுப்பாடு மட்டும்தான்!

மீண்டும் சந்திப்போம்.