வாலு போயிக் கத்தி வந்தது! டும்..டும்...டும்! பரிணாமப் புராணம்!

ஒரு தயாரிப்பு! அதை வெறித்தனமாக விரும்புகிறவர்களையும், வெறித்தனமாக வெறுப்பவர்களையும் என்ன பாடுபடுத்தும் என்பதைச் சரியாகப் புரிந்து கொள்ள வேண்டுமானால், ஆப்பிள் கம்பனி தயாரிப்பைக் கொஞ்சம் பார்த்தீர்களானால் போதும்! ஐபோன் வந்தபோது, அல்லது புதிதாக ஒன்றைத் தயாரித்து சந்தைக்கு விடும்போதெல்லாம்  கடும் குளிரிலும்  க்யூவரிசையில் காத்துக் கிடந்து வாங்கத் தவம் இருந்த அபிமானிகள் கூட்டம் ஒருபுறம் என்றால், அதைப் பார்த்து வெந்து, எரிச்சலோடு அது சொத்தை இது சொத்தை என்று குறை சொல்வதே வேலை என்றிருந்தவர்கள் இன்னொரு புறமாக ஆப்பிள் புராணம் சமீபகாலமாகப் பிரபலமானது! வேண்டுமானால், தமிழைத் தவிர வேறு எந்த மொழியில் வேண்டுமானாலும் தேடிப் பாருங்கள்! ஆப்பிள் புராணம் எவ்வளவு பிரசித்தம் என்பது புரியும்.

இங்கே ஒருத்தர் வேலை மெனக்கெட்டு, ஆப்பிள் தயாரிப்புக்களின் பரிணாம வளர்ச்சியைக் கணித்திருக்கிறார்!  முதலில் ipod! அப்புறம்  iphone!

இப்போது ipad! 

அடுத்தது என்னவாக இருக்கும்? படம் பார்த்துப் புராணத்தைத் தெரிந்து கொள்ளலாம்! பின்னே? நம்ம ஊர்  மார்க்கெட்டுக்கு வருகிற வரையில் அதை மட்டும் தானே செய்ய முடியும்?  

இதைப் பார்த்து ஒரு வாசகர் பதில் கமெண்டின படம் இது! 

 

அங்கெல்லாம் இதை கொஞ்சம் ஸ்போர்டிவாக எடுத்துக் கொள்கிறார்கள்!  அவதூறு வழக்கு எல்லாம் போடுவதில்லை! வெட்டி வேலை என்று நினைக்கிறார்கள் போலிருக்கிறது!

அதெல்லாம் ஒரு பக்கம்! தமிழ்ப் பதிவுகளில், வழக்கம்போல ஒன்று!

வால் பையன் அருண் வழக்கம் போல சீரியஸ்தனம் இல்லாத சீரியஸ் பதிவு, இந்தத் தரம் சிக்கிக் கொண்டது பரிணாமக் கொள்கை,  எழுத ஆரம்பித்திருக்கிறார்! முன்னுரையை முழுசாக எழுதுவதற்கு முன்னாலேயே எதிர்வினைக்குப் போயாகி விட்டது!

சின்ன வயதில் குழந்தைகளுக்கான் பாட்டு, அந்த நாளில் பிரபலம் இது! ஒரு குரங்கு, தன்னுடைய வாலுக்குப் பதிலாகக் கத்தி, அப்புறம் கத்திக்குப் பதிலாக இன்னொன்று, அந்த இன்னொன்றுக்குப்  பதிலாக வேறொன்று, இப்படி போய்க் கொண்டே இருப்பதை நகைச்சுவையாகச் சொல்லும் பாட்டு!

வாலு போயிக் கத்தி வந்தது.......டும்....டும்....டும்!  என்று ஆரம்பிக்கும்!

எழுதியது யாரென்பது, அடுத்த வரிகள் எல்லாம் இப்போது நினைவில் இல்லை! ஆனால், தமிழில் பரிணாமத்தை, பகுத்தறிவோடு  விளக்கப் போனால் இப்படித்தான்  இருக்கும் என்பதை கவிஞர் அப்போதே நன்றாகத் தெரிந்து வைத்து எழுதிய பாட்டு மாதிரித் தான், இப்போது தோன்றுகிறது!

இங்கே இந்த வீடியோவை பாருங்கள்! பரிணாமத்தில்  நான்கு கால்கள் கொண்டதாக இருந்த நிலையில் இருந்து இரண்டு கால்களாக, முதுகெலும்புடன் நிமிர்ந்து நிற்க மனித இனத்துக்கு எத்தனையோ கோடி ஆண்டுகள் ஆயிற்றாம்! அந்த அளவீட்டின் படி, இப்போது பின்னோக்கி சாய்ந்து கொள்ள எத்தனை ஆண்டுகளாகும்? 

நான் முன்னுரை, எதிர்வினைஎல்லாம் எழுதப் போவதில்லை! இந்த வீடியோ ஒன்றே போதும்!

தமிழ்ப்பதிவுகளில் வழக்கம்போல தொடரும் பதிவுகளில் டீன் ஏஜ் பற்றிய சங்கிலிப் பதிவுகள் சிக்கன் குனியா பரவுவது போல........இரண்டு!

என்னத்தைச் சொல்ல!