எழுதி எழுதி ஏட்டைக் கெடுத்து...பாடிப் பாடிப் பாட்டையும் கெடுத்த கதை!

பரிணாமம் திரும்பும் விதம்...!
 

"Bloggers, Internet users and their intelligence"  என்ற தலைப்பில் தான் உளவியல் துறையில்  ஆய்வு மேற் கொண்டிருப்பதாகவும், அதற்கு உதவ விருப்பமிருந்தால், மின்னஞ்சலில் கேள்விப் படிவத்தை அனுப்புவதாகவும்  முன்பின் தெரியாத ஒரு பெண்மணியிடமிருந்து பின்னூட்டத்தில் ஒரு உப்புச் சப்பில்லாத வேண்டுகோள் ஒன்று இரண்டு நாளைக்கு முன்னால் வந்தது.

மொட்டைத் தலைக்கும், முழங்காலுக்கும் முடிச்சுப் போடுவது போல, 'இணையத்தில் புழங்குவோர், வலைப் பதிவர்களும் அவர்களது அறிவுத் திறனும்' இப்படித் தலைப்பைப் பார்த்தபோதே, இது தேறாது என்று முடிவு செய்து, பின்னூட்டத்தை நிராகரித்து விட்டேன். தவிர உதவி கோரும் வார்த்தைகளுமே கூட, நம்மூர்ப் பல்கலைக் கழகங்களுக்கே உரிய ஏனோதானோ மனோபாவத்தில் இருந்த மாதிரித் தோன்றியதால், ஒரு பொருட்டாக எடுத்துக் கொள்ளவுமில்லை.

ஆறுவருடங்களுக்கு மேலாக, இந்தப் பதிவுலகத்தில் குப்பை கொட்டிக் கொண்டிருப்பவனுக்கே, இதன் போக்கு சமயங்களில் பிடிபடுவது கடினமாக இருக்கும்போது மேலோட்டமாக ஒரு செட் கேள்விகளை வைத்துக் கொண்டு பதிவர்களை, அவர்கள் அறிவுத் திறனை எடைபோட்டு விட முடியுமா என்ன?

அடுத்த பெரிய விஷயம் என்ற தலைப்பில் ஆம்ஸ்டர்டாம் நகரில் இருக்கும் trendwatching.com என்ற ஒரு நிறுவனம், தன்னுடைய பெயருக்குத் தகுந்த மாதிரியே, என்னென்ன விஷயங்களில் எப்படிப் பட்ட போக்கு நிலவுகிறது என்பதை ஆராய்ந்து, அதில் சில  யூட்யூப் வீடியோக்களாக வெளி வந்திருப்பதை ஃபைனான்சியல் டைம்ஸ் பத்திரிகைப் பதிவு ஒன்றிலிருந்து தெரிந்து கொள்ள முடிந்தது. அதில் ஒன்று இங்கே! தகவல் தொழில்நுட்பம்  எப்படி நாம் சிந்திப்பதில், எண்ணங்களைப் பகிர்ந்துகொள்வதில், வணிகத் தொடர்புகளில் பெரிய மாற்றத்தைக் கொண்டு வந்திருக்கிறது என்பதை நாலே நிமிடங்களில் எடுத்துக் காட்டிவிடுகிறது.

வலைப் பதிவுகள், இன்டர்நெட் பற்றி நியூ யார்க் நகரில் 2004 ஆம் ஆண்டு பலரிடம் கேள்வி கேட்கப் பட்டபோது, கணிசமானவர்கள் அப்படியென்றால் என்னவென்றே தெரியாது என்றே பதில் சொல்லியிருக்கிறார்கள்! 2008 இல் ட்விட்டர் உலகம் முழுக்கக் கலக்க ஆரம்பித்திருந்த தருணம், எவ்வளவு தடவை ட்விட்டரைப் பயன்படுத்துகிறீர்கள் என்று ஜனங்களிடம் கேட்ட போது ட்விட்டர் என்றால் என்ன என்று எதிர்க் கேள்வி கேட்பதையும் இந்த வீடியோவில் பார்க்கலாம். அடுத்து, ரிமோட் கண்ட்ரோல், எம்பி 3 ப்ளேயர் மாதிரித் தெரிகிற ஒன்றைக் காட்டி இது என்ன என்று கேட்டபோதும் கூட அதே மாதிரி பதில் தான்!

2012 இல் என்ன மாதிரி இருக்கும் என்பதை இதை வைத்து ஒரு கருத்தைச் சொல்கிறார்கள்! பயன்படுத்துபவர்கள் புதிதாக வருகிற ஒன்றை ஏற்றுக் கொள்ளாமல் (அல்லது அறிந்துகொள்ளாமல்) இருக்கலாம்! அதற்காகப் புதிய தொழில்நுட்பங்களை ஏற்றுக் கொண்டு செயல்படுத்தவில்லை என்றால், நம்முடைய கதை கந்தல் தான் என்று முத்தாய்ப்பாகச் சொல்லி முடிக்கிறது!

சில நாட்களுக்கு முன்னால் பிராண்ட் என்றால் என்ன, பிராண்ட் இமேஜ் பற்றிய பதிவுகள் சில  இந்தப் பக்கங்களில் வந்தன.
 
மாதிரிக்கு ஒன்று! இன்னும் ஒன்று!

ஒரு பொருள் அல்லது தயாரிப்பு, தேவையின் நிமித்தம் தொழில் தெரிந்த எவராலோ உருவாகிறது. ஆரம்ப நிலையில், எந்த விதமான நகாசு, ஜிகினா வேலையும் இல்லாமல், எளிமையாகத் தான் அந்தப் பொருள், அல்லது தயாரிப்பு இருக்கிறது.

அடுத்து, கொஞ்சம் விவரமான ஒருவரிடம், அதே பொருள் வந்து சேரும்போது, நகாசு, ஜிகினா வேலைகள் எல்லாம் சேர்ந்து கொள்கிறது.

அப்புறம் கலை தெரிந்தவர்களிடம், சுருக்கமாகக் கலைஞர்களிடம், அந்தப் பொருள் வந்து சேருகிறது.

அவர்களிடம் இருந்து, எம்பிஏ  மாதிரி மேலாண்மையைப் பாடமாகப் படிப்பவர்கள் கையில் அகப்பட்டுக் கொள்கிறது.

அப்புறம் ஒரு அரசு,  நிர்வாகம் அல்லது ஒரு நிர்வாகியிடம் சிக்கிக் கொண்டு, படாத பாடுபட்டு, ஒன்றுக்குமே ஆகாததாகப் போய் விடுகிறது.

இந்த வரிசையில்,  முனைவர் பட்ட ஆராய்ச்சிக்கு எடுத்துக் கொள்வதையும் சேர்த்துக் கொள்ளலாமோ?